Pantagruel
François Rabelais

  Pantagruel restoit tout pensif et melancholique. Frere Jan l'apperceut, et demandoit dont luy venoit telle fascherie non accoustumée, quand le pilot, consyderant les voltigemens du peneau sus la pouppe, et prevoiant un tyrannicque grain et fortunal nouveau, commenda tous estre à l'herte tant nauchiers, fadrins et mousses que nous aultres voyagiers ; feist mettre voiles bas, mejane, contremejane, triou, maistralle, epagon, civadiere ; feist caller les boulingues, trinquet de prore et trinquet de gabie, descendre le grand artemon, et de toutes les antemnes ne rester que les grizelles et courtières.
Soubdain la mer commença s'enfler et tumultuer du bas abysme ; les fortes vagues batre les flans de nos vaisseaulx ; le maistral, accompaigné d'un cole effrené, de noires gruppades, de terribles sions, de mortelles bourrasques, siffler à travers nos antemnes ; le ciel tonner du hault, fouldroyer, esclairer, pleuvoir, gresler ; l'air perdre sa transparence, devenir opacque, tenebreux et obscurcy, si que aultre lumiere ne nous apparoissoit que des fouldres, esclairs et infractions des flambantes nuées ; les categides, thielles, lelapes et presteres enflamber tout au tour de nous par les psoloentes, arges, elicies et aultres ejaculations etherées : nos aspectz tous estres dissipez et perturbez ; les horrificques typhones suspendre les montueuses vagues du courant. Croyez que ce nous sembloit estre l'antique Chaos, on quel estoient feu, air, mer, terre, tous les elemens en refractaire confusion.
Panurge, ayant du contenu en son estomach bien repeu les poissons scatophages, restoit acropy sus le tillac, tout affligé, tout meshaigné, et à demy mort ; invocqua tous les benoistz saincts et sainctes à son ayde, protesta de soy confesser en temps et lieu -, puys s'escria en grand effroy, disant : « Majordome, hau, mon amy, mon pere, mon oncle, produisez un peu de sallé : nous ne boirons tantoust que trop, à ce que je voy. A petit manger bien boire, sera desormais ma devise. Pleust à Dieu et à la benoiste, digne et sacrée Vierge, que maintenant, je diz tout à ceste heure, je feusse en terre ferme bien à mon ayse !
François Rabelais, Quart Livre, chap. XVIII – Comment Pantagruel evada une forte tempeste en mer, 1548