« Doncques pour commencer a decripre et depeindre l'orbe universel, tenant forme triangulaire, il est besoin par la figure presente, laquelle faict demonstraction de la huictiesme partie d'icelluy, commenceant au polle Articque et finissant en l'equinoctial, pour autant qu'elle contient tant en latitude qu'en longitude 90 degrés. Assavoir depuis septentrion vers midy 90 degrés, et d'orrient en occident 90 degrés. En icelle figure sont decriptes les parties sy aprés desduictes, assavoir la partie appellee la terre de Laborador, laquelle est situee prez le polle Articque, comprenant vers la partie d'orient, les terres Norvaigne, et Dennemarc, vers la partie d'occident, la Terre Neufve, dicte Bacaillaux, par devers le midy, les pais de France, Engleterre, Escosse, Irelande, Espaigne, et partie d'Affricque, comme les costes de la Barbarie, Sanagua, et Guinee, jusques en fille Sainct-Omer, qui est soubz l'equinoctial. »