« Ceste figure donne a congnoistre tant en longitude que en latitude, la distance d'un lieu en aultre, contenante les parties d'Asie, d'Europpe, d'Affricque, et Americque. Laquelle figure retient forme d'une ovalle, ayant un ront au meilleu, et a chacun costé dudict ront la moictié de unne circonference, le tout correspondant aux deux polles, dont l'un est dict Articque, et l'autre Antarticque ; retenant aussy l'equinoctial, et tropicques, cercles pollaires, et paralelles, avec les meridiens ; laquelle represente la forme du globe universel, par la depinction de toutes les terres en icelle figures, et quelques uns des fleuves principaulx. L'usage de laquelle est pour congnoistre la situaction de chacun lieu, en quelle haulteur tant de longitude, que de latitude il demeure. Est entendu quant le meridien et paralelle tomben en un certain poinct, et que par icelluy ledict meridien et paralelle s'entrecoupent. »