« Ceste figure faict demonstraction d'une partie de la terre de Laborador, situee soubz la zonne froide, du costé de septentrion, auprés de laquelle est situee une ille anciennement apellee Thillé, et de present Islan, en la quelle les Flamenctz et Engloys font leurs pecheries de mourues. Les abitans d'icelle sont en partie sauvaiges, ayans leurs cavernes et maisons soubz terre. Ceste ille est abondante en beufz, cerfz, biches, et aultres bestial. Il n'y croit nulz blectz. Et vivent de poissons, chairs, et legumaiges. Les abitans d'icelle sont aucunes foys quatre ou cinq moys qu'ilz ne voient poinct le soleil, et autres foys sept ou huict moys a le voir toujours : scavoir est, quant le soleil est a son tropicque de Capricorne au mydy de l'equinoctial. C'est en ce temps la qui ne le peuvent voir. Et quant il est par deca son equinectial, en son tropicque de Cancer, ilz le voient et ont leur esté. Entre l’ille d'Escosse et ceste dicte ille d'Islan sont les Orcades, entre lesquelles est Chutelan, abitee des Escossoys, fretille en blectz, orges, beufz, poissons, et aultres vivres. En la certaine terre de Novergue y croit bled, orge, abondante en beufz, cerfz, et aultre bestial. Les marchandises sont chires, et pelteries de plusieurs sortes. »