« Ceste est une partie d'Affricque, environnee de la mer Aethiopicque, situee soubz la zonne toride, ou quelques fleuves, montaignes et provinces sont decriptes, comme Malcie, Sanaga, Sue, Aethiopie, le royaulme de Mely, Churite, le royaulme d'Orguene, Guinee, Benin. « Ceste region est habondante et fretille en quelques manieres de grains, comme milcq, et aultres graines et fruictz. Aussy habondante en quelques epiceries comme maniguette, pouaivres. Aussy s'y trouve ung grant nombre d'or. Elle nourit tigres, elephans, lions, onces, leopars, rinocerons, et plusieurs mennieres de bestes et serpens, entre lesquelles y a une couleuvre qui croit de longueur de 600 a 700 piez de long, ainsy que tesmoigne Emeric de Vespuce, florentin, en sa cosmographie du nouveau monde. Laquelle couleuvre mengent les beufz, et chievres. Les abitans d'icelle sont negres noirs, et sont nuctz, ayantz les parties honteuses cachees. Ils menent ordinairement guerre les unngs contre les aultres. Entre lesquelz y a hommes qui ont les levres sy grandes qu'elles leur pendent sus la poictrine ; avecques quelques aultres qui n'ont que unng œil au front, lesquelz sont mervilleux et orribles a voir. »