« Ceste est une partie de la terre saincte, portion de l'Asie, envyronnee du costé d'occident de la mer Mediterranee, du costé de mydy la mer Rouge, du costé d'orient le fleuve Euphratres, situee soubz la zonne temperee, soubz le troisiesme climat dia Alexandrias, ou les provinces, montaignes, et fleuves sont decriptes, comme Assirie, Mesophotamie, Chaldee, Sirie, Arabie Deserte, Arabie Petree, Arabie l'Heureuse. Puys Egipte, laquelle est entre le fleuve du Nil et la mer Rouge, lesquelz font la separation de l'Asie, et Affricque, puis les illes de Sipre, et Candie, lesquelles sont en la mer Mediteranee. Ceste region est cultivee, et temperee de animaulx de plusieurs sortes, fretille en aulcuns endroictz en blectz, orges, roysins, daptes, et plusieurs sortes de fruictz. Fort enrichie d'arbres, et herbes de plusieurs sortes. Avec ce, beufz, moutons, chievres, gabelles, et aultres bestes. Les hommes de ceste terre et villes ilustres sont en ceste mennyere : les Babiloniens, Siriens regardent l'orient, les Arabiens, regardent vers mydy, et posedent la mer Arabicque, les Mesopotamiens, du costé de septentrion. »