« Ceste terre est une partie d'Asie, envyronnee du costé de mydy, de la mer oceane, de l'Inde orrientalle, dens laquelle region est comprins partie de la mer Rouge, avec la mer de Perse, ou les provinces sont decriptes, comme Arabie Foelis, autrement dict l'Heureuse, Susiane, Perse, Carmanie, Drangiane, Gedrose, et Arie. Avec partie des montaignes, fleuves, et villes, ausy decriptes. Ceste region est situee sus la fin de la zonne toride, et soubz le commencement de la zonne temperee, soubz les climactz dia Meroes, et finissant soubz la fin du quatriesme climat dia Rodou. Partie des abitans de ceste dicte region sont Mores mahomesticques, n'ayans comme point de blectz, ayans ris, milcq, et aultres mennieres de grains, de quoy ilz vivent. En ceste terre sont beufz, moutons, chievres, cameaulx, et aultres mennieres et sortes de bestes. Les marchandizes sont lacque et encens en abondance. »