« Ceste figure faict demonstration d'une partie ou portion de l'Asie, environnee du costé d'orient de la mer des Moluques, du costé de mydy la mer oceane de l'Inde orientalle et sinus de Ganges, avec la Taprobane, donc les abitans sont couvers de cheveux de femme, et sont idollatres. Ceste ille nourit grant nombre d'elephans. Ausy s'y trouve grant nombre d'espiceries de toutes sortes. Ausy l’ille de Zellan, ou se trouvent les chevaux pour porter en Inde, situee soubz la zonne toride et soubz le commencement de la zonne temperee, soubz le premier climat dia Meroes, et finissant soubz la fin du quatriesme climat dia Rhodou, ou la province de Caillicut commence. Les abitans sont en partie Mores, et machometiques, et idolatres. Ilz adorent les vaches, ilz vivent de ris et legumaiges. Ceste region est fretille en poivre et aultres espiceries aromaticques. Puis tirant du costé de Scitie entour les mons Imaus, sont hommes mengeans chair humaine. Et ausy y a il hommes qui ont la plante des piectz tournee a rebours, vivans avec les bestes. Ausy y a il hommes n'ayant que ung œil au front, lesquelz font continuellement guerre aux griffons. Envyron le fleuve de Ganges y a hommes nommés Astomy, sans bouche, seullement vivans de l'alaine et odeur qu'ilz tirent par les narinnes. Oultre ceux cy en la derniere partie des montaignes jusques a la gent prasi, se disent estre Piqmees, n'ayantz haulteur que d'ung pied, lesquelz sont infestés et molestés des grues. Envyron la source de Ganges se trouvent gens nommés Monoceli, qui n'ont que unng pied, de merveilleuse legereté a saulter, ausy aultres apellés Sciopedes, lesquelz au temps de challeur se couchent a terre sus le dos, et se couvrent des injures du soleil par l'ombre de leur pied, qui est de grandeur sufisante pour en estre couvers. Envyron les motaignes Rhiphees se trouvent gens ayans testes de chiens, et abayans au lieu de parler, ainssy que dict Marc Venitien. »