« Ceste terre est partie d'Americque, envyronnee du costé d'orient de la mer occeane, du costé de midy le detroit de Magellan, estant situee soubz la zonne temperee soubz le commencement du premier climat antidia Meroes, et finissant soubz la fin du neufiesme climat antidia Damias, ou l'on pourra voir le royaulme de Guiganton, et le royaulme de Prate, qu'on disons la riviere de Platte, fort riche en argent. Les hommes de ce royaulme sont sauvaiges, n'ayant congnoissance de Dieu. Lesquelz sont vestus de quelques acoutremens de coton. Leurs grains sont milcq et manioc, et aultres racines, dequoy ilz font farine et pain n'ayans nulctz blectz. Les Espaignolz ont ordinairement traficqué en ceste riviere. Envyron le royaulme de Guiganton sont hommes ayans dix et douxe couldees de haulteur, et ne parlent que par sifler. En ceste region y a forse sengliers, serfz, biches, et une sorte de beste ayant le nectz camus, et grandes mamelles. Avec ce plusieurs et diverses sortes de papegaulx, et oeseaux ayant le bec faict ainsy comme une cuiller. Ausy serpens de diverses condictions et formes. »