« Ceste est la Terre-Neufve, partie de la region dicte Bacaillaux, situee soubz la zonne temperee, soubz le septiesme climat dia Boristenous, ou l'on pourra voir le Canada et Saguené, Ochelasa, et plusieurs aultres lieux ou les hommes sauvaiges de ce lieu font leur demeure. Lesquelz sont vetus de plusieurs sortes de peaux, et ne croient que a la lune, et au soleil. Ilz sont adroictz a tirer de l'arc, et jecter sajectes. Leur menniere de recouvrer vivres est de tirer aux cerfz et biches, et a plusieurs sortes tant bestes, que oeseaulx, lesquelz il sechent aprés les avoir tués, puys tuent des poissons, que l'on nomme loups marins, desquelz ilz font de l'huille, pour ce qu'il sont fort gras, et dedens ladicte huille mettent leurs chers pour leurs provisions, tellement que ceste victouaille se peult garder ung an sans enpirer. »